SERMON TU JAMITA MINGGU - MINGGU OKULI, 08 MARET 2026 - 1 KRONIKA 22 : 14 - 19

1 KRONIKA 22 : 14 - 19   

      TOPIK: PADIRI ROHA DOHOT HOSA MANGALULUI JAHOWA

(MENGARAHKAN HATI DAN JIWA UNTUK MENCARI TUHAN)

I.        Patujolo

Buku Kronika ima buku na marisihon Sejarah ni bangso Israel, jala sian pendapat ni angka teolog, digurithon ma buku on di abad 5 SM, dung mulak bangso i sian habuangan ni Babel. Jala sian angka pendapat ni teolog, taringot tu na manggurithon buku on jotjot dipahombar tu si Esra, ala adong hadomuan ni Buku Esra nang Buku Nehemia tu Buku Kronika on. Marhite Buku Kronika on, dipatuduhon tu hita: 1) Identitas sejarah partondion nang parsombaon ni bangso Israel, 2) hinaringkot ni parsombaon, pamujion, nang songon i Bagas Joro ni Debata, jala 3) hinaringkot ni mangaradoti patik jala mangolu di bagasan panghirimon, hasatiaon, nang haunduhon tu Debata. Di bagasan turpuk on, di 1 Kronika Bindu 22 on, diparade si David do angka na ringkot taringot tu pajongjonghon dohot paulihon Bagas Joro ni Debata, nangpe so ibana na laho pajongjonghon i, ala mansai godang mudar didurushon si David saleleng gabe pangomgomi ibana. Alani, namanguduti ulaon i jala na diloas Debata pajongjong Bagas Joro i ima anakni si David, ima si Salomo. Nang pe songon i, dijalo si David doi, jala dipajuju do si Salamo huhut diparade ibana angka na ringkot tu si asa boi anakna i pajongjong Bagas Joro hombar tu sangkap ni Debata. Asa lam tangkas, tajaha ma hatorangan ni turpuk on.

II.      Hatorangan ni Turpuk

Ay. 14 - 16, marsangkap do si David naeng pajongjong bagas joro ni Debata, asa di bagasan Bagas Joro i, boi dibahen nasida inganan Poti Parpadanan i. Nang pe ndang diloas Debata ia si David pajongjong Bagas Joro i marhite tanganna, alai dipapungu si David angka na ringkot pajongjong Joro i asa diuduti si Salomo. Dipapungu si David ma angka na ringkot i tingki di bagasan hasusaan, jala diulahon i laho tu Debata do. Pandohan “dibagasan hasusaan pe au na sai laon” ima sian Hata Heber בְּעָנְיִי (be‘onyi) – dalam penderitaanku/ jerih payahku. Diparade ibana ma sian saratus ribu talenta sere, sajuta talenta perak, angka tombaga dohot bosi na so boi timbangon dibahen hinagodangna; nang songon i di angka hau nang batu na ringkot laho pajongjong Bagas Joro i. Jala diparade si David do muse angka pande tukang na boi pajongjong Bagas joro i. Mansai denggan do angka pangaradeon ni si David asa boi diulahon anakna si Salomo pajongjong Bagas Joro ni Debata. Ala naung rade sude angka na ringkot i, ingkon hehe jala diulahon si Salomo ma i. Didongani Debata Jahowa do nasida mangulahon i sahat tu na singkop Joro i.  Adong do jaminan manang pangaramotion nang pandonganion ni Debata tingki diulahon nasida ulaon na denggan pajongjong Bagas Joro i. Jaminan penyertaan Tuhan dalam pekerjaan tersebut merupakan sumber kekuatan, dan ini harus diikuti dengan keberanian dan tindakan iman. Alani ingkon hehe jala diulahon ma ulaon i di bagasan pandonganion ni Debata. Pandohan “hehe ma ho jala ulahon” ima sian Hata Heber חֲזַק וַעֲשֵׂה (chazaq va‘aseh) – bangkitlah dan bekerjalah. Ini adalah seruan tindakan, bukan hanya terbatas di rencana.

Ay. 17 – 18, Dinalaho mamande Bagas Joro i, diapoi jala diarahon si David ma saluhut induk ni Israel masiurupan nasida mangurupi si Salomo asa singkop jala denggan Bagas Joro i. Molo nunga mardalan ulaon pajongjong Joro i, didongani Debata do nasida jala dipadame Debata do angka na dihumaliang ni bangso i, tarlumobi sian angka bangso na asing. Ndang loason ni Debata ia bangso na asing manegai ulaon i.  Hata “mardame hamu humaliang” ima sian Hata Heber הֵנִיחַ (heniakh) –memberi ketenteraman, dari akar נוח (nuach): istirahat, damai. On laho patoguhon haporseaon ni bangso i, asa unang mabiar roha ni angka bangso i nang halak namamande Bagas Joro i. Tuhan memberikan keamanan dari segala penjuru wilayah. Masa damai yang diberikan Tuhan adalah kesempatan untuk membangun Bait Allah tersebut.

Ay. 19, diarahon panurat ni Buku on do tu sude angka nanaeng pajongjong Bagas Joro ni Debata i asa padiri roha dohot hosana mangalului Debata Jahowa. Ingkon hehe do nasida laho paulihon inganan na badia di Debata Jahowa, asa masuk Poti Parpadanan ni Jahowa, dohot ulaula ni Debata, ima angka sipaulion di Goar ni Jahowa. Pandohan “padiri hamu ma rohamuna” ima sian Hata Heber תְּנוּ לְבַבְכֶם (tenu levavkhem) sian kt. Levav (hati) – arahkanlah hatimu - pusat kehendak dan pikiran, jala hata “hosamuna” ima sian Hata Heber וְנַפְשְׁכֶם (venafshekhem) kt. Nefesh (hidup/ nafas) – jiwamu, kehidupanmu. Hata “mangalului” ima sian Hata Heber לִדְרוֹשׁ (lidrosh) kt. דרש (darash) - menyelidiki, mencari dengan sungguh-sungguh. Pajongjong dohot paulihon Bagas Joro ni Debata (manag ulaon na ringkot tu Debata) ndang holan mangasahon gogo sian pamatang, arta, manang huaso sambing, alai na borhat sian ni roha dohot ngolu na marsitutu jala sai mangalului Debata Jahowa di ganup ulaonna.  

III.   Refleksi

Turpuk on pataridahon hasatiaon ni si David tu Debata paradehon angka na ringkot laho pajongjonghon Bagas Joro ni Debata, nang pe so sian tanganna pajongjong Bagas Joro i. Ai ido sangkap ni Debata tu ibana. Nangpe songon i, pos do rohana jala dipatuduhon do holongna tu Debata marhite paradehon na ringkot sian bahan bangunan, pande, jala nunga dipajujuh anakna si Salomo,  asa boi mangulahon Ulaon na balga i, huhut diurupi angka Induk ni Israel. Ingkon hehe do si Salomo jala mangulahon ulaon i hombar tu parsuruon dohot sangkap ni Debata. Alani ditonahon si David do ia si Salomo asa padiri roha nang hosana mangulului Debata Jahowa di ngolu nang angka ulaonna, tarlumobi di na pajongjong Bagas Joro i. Molo diulahon i dohot denggan, sai diurupi, diramoti, jala didongani Debata do ia si Salomo laho paulihon Bagas Joro ni Debata sahat tu na singkop.

            Molo dipahombar tu Minggu Okuli, sian Hata Latin: Oculi mei semper ad Dominum– Mataku tetap terarah kepada TUHAN – Sai Tong Mangaranap Matangku Dompak Jahowa (Psalm 25:15a) laho manungguli roha nang haporseaonta asa mulak hita tu dalan ni Debata, jala mangaranap hita tu Ibana. Hinadenggan jala hasisingkop ni angka ulaonnta di portibi nang ngolu siganup ari ndang alani gogo ni jolma i sambing, alai marhite pandonganion, pangaramotion, nang gogo na sian Debata, singkop angka panghobasion, jala denggan marture nang angka ulaon siganup ari. Di Minggu on tarlumobi masa prapaskah on, diarahon do Ruas HKBP asa mangaranap huhut mangarahon diri tu Tuhan Debata, jala unang marpangusandean tu gogo na sambing nang gogo ni portibi on. Jemaat HKBP diajak kembali memusatkan perhatian kepada Tuhan, bukan pada kekuatan diri sendiri maupun dunia ini. Manang ise na sai marpanghirimon tu Debata, mangido gogo tu Debata, jala mangaranap tu Ibana ganup di ulaon nang panghobasionna, dilehon Debata do gogo nang ragam ni pasupasuNa. Ketika kita menghadapi tekanan dalam perjalanan hidup ini, mari kita bertahan, memohon kekuatan, serta berfokus kepada Tuhan. Jika mata, jiwa, dan hidup kita tetap tertuju (fokus) kepada Tuhan, kita akan dikuatkan serta dimampukan untuk mengerjakan bagian kita sesuai dengan rencana-Nya. AMEN.

Firman Oktavianus Hutagaol

Sihite, 02 Maret 2026

Pendeta Fungsional di HKBP Sihite - Resort Sihite - Distrik III Humbang