EPESUS
5 : 8 - 14
TOPIK: MARPARANGE
SONGON ANGKA ANAK HATIURON
(HIDUP SEBAGAI ANAK-ANAK TERANG)
I.
Patujolo
Surat ni Apostel Paulus tu huria Epesus, ima
surat na digurithon ibana tingki di bagasan hurungan (hurang lobi di taon 60-62
SM), jala ditujuhon tu huria na adong di Epesus, sada kota na balga di Asia
Kecil. Hatiha i, kota Epesus ima sada pusat perdagangan jala pusat ni ugamo na
manomba angka ganaganaan, tarlumobi na marsomba tu Dewi Artemis (sada sian
debata ni halak Gorik). Di bagian ni turpuk ta on, di Epesus 5 : 8 – 14 ima
bagian praktis manang siparangehonon ni angka na porsea i asa marparange songon
anak hatiuron. Adong haimbaruon ni status, ima sian haholomon tu hatiuron, ima
sian haportibion gabe tiur di bagasan Debata. Adong transformasi, adong identitas
na dipaimbaru, jala on ma joujou eskatologis,
asa mangolu di bagasan hatiuron ala naung ro Jesus tu portibi on nang tu ngolu
ni angka na porsea i. Asa lam tangkas, tajaha ma hatorangan ni turpuk on.
II. Hatorangan ni Turpuk
Ay.
8 – 9, dung dipaandar
Apostel Paulus angka hadirion ni haholomon nang angka parangena na mangolu di
pardagingon dohot portibi sian ay. 3 – 7, dipatorang Apostel Paulus do di ayat
8 - 9 ima haimbaruon ni identitas,
status, nang hadirion ni angka na
porsea i dung mangolu nasida di bagasan hatiuron na sian Debata, ima di bagasan
Kristus. Hata “tiur” ima sian Hata Gorik φῶς (phōs) – terang, terang secara rohani; sesuai kebenaran dari Allah, jala hata “anak
hatiuron” ima sian Hata Gorik τέκνα φωτός (tekna phōtos) – anak-anak terang, identitas baru di dalam terang Tuhan Allah. Di bagasan parange
hatiuron i marparbuehon angka habasaon, hatigoran, dohot hasintongan di parange
nasida di ngolu siganup ari hombar tu parange ni Kristus. Hata “habasaon” ima
sian Hata Gorik ἀγαθωσύνη (agathōsynē) – kebaikan moral dan nyata dalam
tindakan hidup sehari-hari, hata “hatigoran” ima sian Hata Gorik δικαιοσύνη
(dikaiosynē) – keadilan, hidup sesuai standar Allah, jala hata
“hasintongan” ima sian Hata Gorik ἀλήθεια (alētheia) – kebenaran.
Ay. 10 – 12, songon anak hatiuron do
nasida, ingkon tangkas an nasida ma dia lomo ni roha ni Debata na ingkon
siulahonon jala sipasidingon nasida di ngolu siganup ari. Hata “tangkasi” ima
sian Hata Gorik δοκιμάζοντες (dokimazontes) – menguji, membuktikan, menilai dengan cermat; menyaring yang benar.
Alani unang saor ngolu ni anak hatiuron i tu angka ulaon haholomon na soada
parbuena, ala haholomon sian turpuk on martudutudu tu angka parange ni halak
naung tarpodom jala mate do ngolu partondion, haporseaon, nang panghirimonna tu
Debata. On ma ulaon ni anak Hatiuron i, pasidohot do nasida maminsang angka na
halak na mangolu di bagasan haholomon, asa adong hamubaon ni roha di nasida.
Hata “maminsang” ima sian Hata Gorik ἐλέγχετε (elegchete) – menegur, menyatakan salah. Ulaon ni
angka anak hatiuron ima gabe parsidohot nasida di angka ulaon na denggan jala
maminsang angka halak na mangolu di bagasan haholomon, tarlumobi di angka
parange haholomon na ditabunihon nasida, isarana songon angka hagiot ni daging,
parmainanon, ragam ni hahorangon, pangahution, marhata barangsi, marsomba tu
angka gogo haportibion, dohot angka lan na asing na gok hailaon.
Ay.
13 - 14, patar doi
saluhutna dung sinondangan ni Hatiuron na sian Kristus i. Ulaon ni hatiuron
manondangi haholomon i jala paubahonna gabe inganan hatiuron. Hatiuron na
marharoroan si Kristus manondangi ngolu ni halak na di bagasan haholomon, gabe
mangalehon hamubaon ni roha gabe parsidohot nasida mangolu di bagasan hatiuron.
Jesus do Hatiuron na sian Banua Ginjang i, jala mian ma sinondang ni hatiuron i
di ngolu angka na porsea jala ingkon patar huhut diparangehon do saluhutna i di
ngolu siganup ari. Jala hatiuron na binonan ni Kristus mangalehon hamonangan tu
hatiuron sian haholomon i. Marhite sinondang na sian Kristus, angka na tarpodom
jala mate partondionna, haporseaonna, nang panghirimonna alani haholomon i,
gabe tarsunggul jala hehe nasida ala sinondang ni Kristus i. Hata “sondangan ni
Kristus” ima sian Hata Gorik ἐπιφαύσει (epiphausei) – akan
menyinari, terang Kristus yang menyinari dan memberi hidup. Ini adalah seruan pertobatan dan kebangkitan
rohani; Kristus adalah sumber terang yang memberi kehidupan.
III. Refleksi
Turpuk on patuduhon tu hita adong perubahan
identitas, status, nang hadirion ni angka halak naung manjangkon Kristus di
bagasan ngoluna, jala marsinondang do ngoluna songon anak Hatiuron. Turpuk on mangarahon
hita asa mangolu di bagasan Hatiuron huhut marparangehon angka parange Hatiuron
na sian Kristus i. Halak naung disondangi hatiuron na sian Kristus ndang
mangolu be nasida di angka parange haholomon nang haportibion, ndang mate jala
tarpodom be haporseaon, panghirimon, nang partondionna maradophon Kristus. Gabe
mangolu ma nasida di bagasan hatiuron Kristus i. Gabe parsidohot nasida
maminsang jala pasidinghon angka parange haholomon i di ngolu siganup ari. On
ma gabe las ni roha di angka anak hatiuron i, ala patar do Hatiuron ni Debata
marhite Kristus na manondangi ngolu ni angka na porsea i jala mambahen nasida
gabe anak hatiuron ni Debata.
Molo dipahombar tu Minggu Letare, sian Hata Latin: Laetare – Bersukacitalah – Marlas ni roha ma hamu (Jes. 66:10 a), laho manggohi las ni rohanta di bagasan Kristus naung manondangi hita sian haholomon, dosa, nang hamataean i, gabe taruli hita jala gabe anak Hatiuron ni Kristus do hita. Alani ingkon marlas ni roha do hita alani Kristus. Dipaimbaru Kristus do hadirionta sian haholomon tu anak hatiuron, jala mangarahon hita asa marhamubaon ni roha di masa Prapaskah on, ala jonok nama Haluaon na pinatupa ni Kristus i marhite hamamatena. Las ni roha tubu sian Hamubaon ni roha na disondangi Kristus. Alani, di Minggu Letare on, ruas HKBP diarahon untuk marlas ni roha alani Kristus na ro manondangi roha nang dirinta asa tongtong mangolu hita di bagasan hatiuron nang panghirimon i. Nunga patar sondang dohot hatiuron ni Kristus i di hita, jala tarjou do hita asa mangolu songon anak hatiuron. AMEN.
Tidak ada komentar:
Posting Komentar